Ragnhildur Bjarkadóttir
Sálfræðingur
26/9/2016
·
3
mínútna lestur
Fjölskyldulífið

Sumarfrí fjölskyldunnar. Himneskt eða hræðilegt?

Þegar ég fer í sumarfrí ætla ég njóta lífsins, taka garðinn í gegn, lakka gluggana, fara í tjaldútilegu og fjallgöngu, skoða hálendið, rækta grænmeti og safna orkunni sem ég er búin að þurrka upp síðastliðna vetrarmánuði. Ekki má heldur gleyma því að börnin mín eru líka í fríi þannig að ég ætla að finna upp á óvæntum og skemmtilegum ævintýrum fyrir þau svo að sumarið verði ógleymanlegt.

Eða hvað?

Ofangreind orðræða er dæmi um hugsanir sem læðast inn í heilabúið með hækkandi sól og skreyta dagdrauma vormánaða um hið fullkomna sumarfrí. En ef við skoðum staðreyndir málsins þá er sumarfrí einungis lítið brotabrot af árinu og alls ekki til þess fallið að sigrast á uppsöfnuðum verkefnalista eða samviskubiti síðastliðinna mánaða.

Oft er sumarið mest krefjandi tími ársins fyrir fjölskyldufólk því þá hverfur dagleg rútína. Í staðinn þarf að skipuleggja námskeiðahald fyrir börnin á meðan foreldrar eru enn í vinnu, ræða þarf fyrirkomulag við fyrrverandi maka ef fjölskyldan er samsett og jafnvel getur par ekki tekið sumarfrí samtímis nema að hluta til. Draumurinn um að láta allt gerast á þessum stutta tíma er því fljótur að renna í sandinn í raunveruleikanum. En það er ekki þar með sagt að öll von sé úti.

Mikilvægt er að ræða væntingar fjölskyldumeðlima til sumarfrísins

Það er auðvelt að eiga notalegt sumarfrí í faðmi fjölskyldunnar ef undirbúningurinn er góður. Það að ræða væntingar hvers og eins í fjölskyldunni gagnvart því hvað hægt sé að gera í sumarfríinu er góð byrjun. Hver og einn fær tækifæri til að leggja fram hugmyndir og þær síðan skoðaðar og metnar á raunhæfan hátt með tilliti til aðstæðna og efna. Í öðru lagi eru skapandi hugsunarháttur og skipulag góð verkfæri til að leggja grunn að ánægjulegum stundum.

Í þriðja lagi, ef væntingar, frjó hugsun og skipulag er til staðar, þá er dýrmætasti eiginleiki fjölskyldunnar að kunna að njóta augnabliksins. Það að geta einsett sér að vera með fulla einbeitingu í raunaðstæðum en ekki svamlandi í hugsunum fortíðar eða framtíðar er grunnur að hamingjusömum minningum sem ylja notalega yfir vetrartímann.

 

Gleðilegt sumar!

 

 

 

 

Ragnhildur Bjarkadóttir
Sálfræðingur
Fleiri pistlar